Со огромно задоволство земавме активно учество и го поддржавме 28. Конгрес на Сојузот на хемичарите и технолозите на Македонија, настан кој обедини околу 200 учесници од 24 земји, меѓу кои и 30 избрани студенти.
Инспирација од светски рамки
Со восхит го проследивме фасцинантното пленарно предавање на еминентната проф. д-р Светлана Мојсов, научничка со светско реноме, родум од Скопје, насловено: Chemistry matters: from a putative peptide to effective medicines for diabetes and obesity. Изразуваме длабока почит кон нејзината долгогодишна работа и историски придонес во науката. Со своите истражувања на пептидните хормони и нејзината клучна улога во идентификувањето на активниот фрагмент на GLP-1, таа ги поставила научните основи за развој на една нова класа лекови (Ozempic, Wegovy и др.) што донесе револуција во третманот на дијабетес тип 2 и гојазност, помагајќи им на милиони луѓе на глобално ниво. Нè инспирираше сите не само со нејзиниот генијален ум, темелност и посветеност кон науката, но и со нејзината извонредна скромност, етичност и отвореност за дискусија со помладите колеги и студенти.
Учењето од нашите професори никогаш не завршува во студентските клупи, но имавме можност да проследиме и бројни резултати од предавањата на наши драги клиенти и соработници од истражувачките лаборатории, академската заедница и индустријата во Македонија.
Успешни презентации на нашиот стручен тим
Kолешка Христина Тришеска имаше кратко соопштение (е-постер) на тема од нејзината магистерска теза, насловено: Optimization and application of a method for determining the aromatic profile of Macedonian white wines using gas chromatography coupled with mass spectrometry. Додека пак колешката Јулијана Димзова говореше за: Comparative evaluation of laboratory developed and pharmacopeial HPLC methods for cannabinoid quantification, сработено заедно со колегите Димитар Гушески и Христина Тришеска во рамки на Фармахем Лабораторија за животна средина.
Упатуваме искрени честитки до Организациониот и Научниот одбор за високото професионално ниво и успешно организираниот Конгрес, како и заложбата на Институтот за хемија при ПМФ за признанијата на проф. д-р Светлана Мојсов и во Македонија.
Имавме прилика за плодни дискусии со фелата, вмрежување и размена на драгоцени искуства и визии за развој крај брегот на Охридското езеро.
